O pasado venres, 14 de outubro de 2016, saíu o último número, o 55, do semanario Ahora, un xornal de formato xigantesco para as medidas estándar da prensa española. Tan grandes eran que cada número incluía información sobre o xeito máis apropiado de dobralo para lelo mellor. Mais non só era grande polo seu formato, senón tamén por algúns dos seus contidos e polo afán que movía a empresa dirixida por Miguel Ángel Aguilar. Como apuntaban na nota de despedida: «hemos querido emplear la voz de la energía templada y no la del sectarismo odioso; la de la exigente objetividad y no la de la retórica altisonante; la de los injustamente tratados y no la de la mediocridad banal […] Nos hemos prohibido mezclar la crítica con el insulto, hemos admitido que a nuestros opositores les asistiera la razón y que sus razones, aunque fueran malas razones, pudieran ser desinteresadas. Sabemos que puede bastar el convencimiento de tener razón para que los partidos o los hombres cierren con violencia la boca de sus oponentes y la democracia deje de existir. Consideramos que la cobardía del adversario para nada disculpa que nos convirtamos en cobardes y que sus errores tampoco generan indulgencia para los nuestros».

Nalgunhas das frases da despedida resoa o eco do pensamento de Albert Camus, citado expresamente, e de Rafael Sánchez Ferlosio, do que apareceron con regularidade no semanario os seus sempre motivadores pecios, esa especie de píldoras anfetáminicas que tratan de cuestionar os designios do Altísimo ou da Necesidade Histórica, por empregar as súas propias palabras. No último número do semanario recollían una nota de Ferlosio sobre o terrorismo, ¡de 1980!, na que, entre outras cousas, dicía algo que aínda hoxe se pode aplicar non só aos terroristas senón tamén a certos xeitos de facer política: «No hay nadie éticamente más abyecto que el que induce su propia bondad  o la de sus acciones de la maldad de sus víctimas o enemigos, ni nadie más bellaco que el que declara malo a aquel de cuyo daño necesita o desea desentenderse».

Ahora tamén foi o título dun interesante xornal gráfico español (1930-1939) do que foi subdirector Manuel Chaves Nogales, un gran xornalista defensor da legalidade republicana que morreu no exilio odiado por extremistas de esquerda e de dereita. Agora que xa non temos ningún dos dous Ahora, ler a Chaves Nogales, Ferlosio ou Camus pode ser un bo antídoto contra o sectarismo partidista, o espectáculo histérico-melodramático-sentimental e a vulgaridade políticas e mediáticas que inzan de xeito alarmante neste país.